S'ambulante tonaresu

Cun d'unu cadditteddu feu e lanzu

sa vida tua a istentu la trazas;

da'una 'idda a s'attera viazas,

faghes Pasca e Nadale in logu istranzu.

A caldu e frittu girende t'iscazas

pro chimbe o ses iscudos de 'alanzu,

dae s'incassu de sett'otto sonazas

chi malamente pagant'unu pranzu.

Sempre ramingu senza tenner pasu,

de una 'idda a s'attera t'ifferis

aboghinende inue tottu colas:

«Discos nobos pro fagher su casu

e chie leat truddas e tazeris

e palias de forru e de arzolas!».

Peppinu Mereu